“சுமார் இருபத்தி ஐந்து வருடங்களுக்கு முன்பு நான் எனது வீட்டின் அருகில் சிறிய அளவில் அழகு மற்றும் உடற்பயிற்சி மையம் ஒன்றை ஆரம்பித்த போது “பாரு…..பாரு …….ஆறே மாசத்துல இதை நீ இழுத்து மூடப் போற…..” என்று என் கணவர் என்னைப் பார்த்துக் கிண்டல் செய்தார்.
என்னுடைய மாமனாரோ ’என்னுடைய மருமகள் முடி திருத்தும் வேலை செய்வதை நான் விரும்பவில்லை’ என்று சொன்னார். இது போன்ற எத்தனையோ ஏளனங்களைப் புறந்தள்ளிதான் நான் இந்த உயரத்தைத் தொட்டிருக்கிறேன்” என்கிறார் இந்திய பிட்னெஸ் தொழில் உலகின் ராணியாக வலம்வரும் வந்தனா லுத்ரா.
யார் இந்த வந்தனா லுத்ரா? வி.எல்.சி.சி என்ற நிறுவனத்தைக் கேள்விப்பட்டிருக்கிறீர்கள்தானே? அதன் உரிமையாளர்தான் இவர்.
தன்னுடைய வி.எல்.சி.சி ஹெல்த் கேர் லிமிடெட்(VLCC HEALTHCARE LIMITED) என்கிற ஃபிட்னெஸ் நிறுவனம் மூலம் சுமார் ரூ.1000 கோடி ரூபாய் அளவுக்கு வணிகம் செய்கிறார் வந்தனா. அனுபவம் மிக்க மருத்துவர்கள், திறமையான ஊட்டச்சத்து நிபுணர்கள், ஆரோக்கியம், அழகு சார்ந்த நிபுணர்கள் என்று பலர் இவரது நிறுவனத்தில் பணிபுரிகின்றனர்.
இந்தியா முழுக்க 90க்கும் மேற்பட்ட நகரங்களில் இருக்கும் 200க்கும் மேற்பட்ட இடங்களிலும் வெளிநாடுகளிலும் கிளைகள் என்று தனது தொழில் சாம்ராஜ்யத்தை நச்சென்று நிறுவி அசர வைத்திருக்கிறார் டெல்லியைச் சேர்ந்த இந்த அறுபது வயதுப் பெண். ஆமாங்க, அவங்க வயசு 60 தான்!
“நடுத்தரக் குடும்பம் என்னுடையது. எங்கள் குடும்பத்தில் யாருக்கும் தொழில் செய்து பழக்கம் கிடையாது. அப்பாவுக்கு படிப்பின் மீது பயங்கர ஆர்வம். அதனால் என்னை நிறைய படிக்க வைக்க வேண்டும் என்று நினைத்தார். அதனால் என்னை வெளிநாட்டுக்கெல்லாம் அனுப்பி படிக்க வைக்க நினைத்தார்.
ஆனால் எனக்கோ அழகுக் கலையின் மீது தான் கவனம் இருந்தது. நான் சிறு குழந்தையாக இருக்கும்போதே அம்மாவுக்கு ஒப்பனை செய்துவிடுவது, தலைமுடி திருத்துவது என்று இருப்பேனாம்.
இப்படிப்பட்ட மனநிலை கொண்ட பெண்ணாக வளர்ந்த நான் அப்பாவிடம் அழகு சார்ந்த படிப்பை வெளிநாட்டில் படிக்கப் போகிறேன் என்று சொன்னேன். முதலில் அப்பா சம்மதம் சொல்லவில்லை. கடும் முயற்சிக்குப் பிறகு அப்பாவை சம்மதிக்க வைத்தேன்.
அழகு மற்றும் ஃபிட்னெஸ் சம்பந்தமான படிப்புகள் இந்தியாவில் அதிகம் பிரபலமாகாத காலம் அது. அதனால், பாரிஸ், லண்டன், ஜெர்மனி என்று பல நாடுகளுக்கு பயணம் ஆனேன். அங்கே கூந்தல் பராமரிப்பு, பிட்னெஸ், ஒப்பனைக்கலை சம்பந்தமான படிப்புகளைப் படித்தேன்.
உடலை நேர்த்தியாக ஆரோக்கியமாக வைத்துக் கொள்வது என்பது ஏதோ ஆண்களுக்கு மட்டுமே தேவையான ஒன்று என்கிற எண்ணத்தில் இருக்கும் நம் இந்திய மக்களின் பொது மனநிலையை நம்மால் முடிந்த அளவு மாற்ற வேண்டும் என்கிற வைராக்கியம் அப்போதுதான் எனக்குள் வந்தது” என்று சொல்லும் இவருக்கு அதன் பிறகு திருமணமும் நடந்திருக்கிறது. சுமார் ஆறு வருடங்கள் குடும்பத் தலைவியாக மட்டும் வாழ்க்கையை நகர்த்தி இருக்கிறார் வந்தனா.
“திருமணம்,அடுத்தடுத்து இரண்டு பெண் குழந்தைகள் என்று என் வாழ்க்கையும் சராசரியாக நகர்ந்தது. ஆனாலும் தொழில் முனைவோராக ஆகவேண்டும் என்கிற ஆர்வமும் ஒரு பக்கம் எனக்குள் எட்டிப் பார்த்துக் கொண்டே இருந்தது.
அதனால் என்னுடைய இரண்டாவது பெண் குழந்தை தவழ்கின்ற பருவத்தில் இருந்த போது எனது வீட்டின் அருகிலேயே இடம் ஒன்றை வாடகைக்குப் பிடித்து சிறிய அளவில் ஆண், பெண் இருவருக்குமான அழகு, உடல் நல நிறுவனத்தைத் தொடங்கினேன்” என்று தான் தொழில் ஆரம்பித்த கதையைப் பகிர்ந்து கொள்கிறார் வந்தனா.
“நான் தில்லியில் கல்லூரியில் படித்துக் கொண்டிருந்த போது, உடல் பருமனால் அவதிப்பட்ட நிறைய பேரை சந்தித்திருக்கிறேன். எப்படியாவது நம் உடல் எடையை குறைத்துவிட முடியாதா என்கிற தவிப்பும் அவர்களிடம் இருந்ததை நான் பார்த்திருக்கிறேன்.
அதுமட்டுமல்ல உடல் பருமன் என்பதை, இன்றைய சமூகம் கவுரவம் சார்ந்த ஒன்றாகப் பார்க்கிறது. ஆனால் 1990களிலோ அதை ஒரு நோய் போல பாவித்தார்கள். அதனால் இது போன்ற பிரச்சனைகளோடு என்னிடம் வந்த அப்போதைய வாடிக்கையாளர்களை மிகவும் பக்குவமாகக் கையாண்டேன்.
அதீத கவனத்தோடு அனுபவம் மிகுந்த மருத்துவர்களின் உதவியோடும் பிரச்னைகளுக்கான தீர்வுகளை அவர்களுக்குக் கொடுத்தேன். இந்தத் தொழிலை நான் ஆரம்பித்த நேரத்தில் எனக்குப் பெரிதாய் எந்த ஒரு லாபமும் இல்லை. ஆனால் நான் அதைப் பற்றிப் பெரிதாய் கவலைப்படவும் இல்லை.
கிடைத்த சொற்ப வாடிக்கையாளர்களுக்கும் நூறு விழுக்காடு உழைப்பைக் கொடுத்தேன். அறிவியல் பூர்வமான உடல் எடை குறைப்பு முறைகள்,பக்க விளைவுகள் இல்லாத அழகு சிகிச்சை முறைகள் என்று பார்த்துப் பார்த்து ஒவ்வொரு செயலையும் வாடிக்கையாளர்களுக்குச் செய்தேன்.
அதன் பலன் கொஞ்ச நாள் கழித்து எனக்கு வந்தது. ஒரு முறை வந்தவர்களின் வாய் வழியான விளம்பரம் எனக்கு இன்னும் பல வாடிக்கையாளர்களைக் கொண்டு வந்து சேர்த்தது.
அவ்வளவுதான்… என்னுடைய தொழிலுக்கான வெற்றிப் புள்ளி அந்த இடத்தில் இருந்து ஆரம்பமானது.
கொஞ்சம் கொஞ்சமாக அடுத்தடுத்த இடங்களில் வி.எல்.சி.சி-யின் கிளைகளை ஆரம்பித்தேன். ஆனால் இந்த இடத்தில் முக்கியமான ஒரு செய்தியை உங்களிடம் பகிர்ந்து கொள்ள வேண்டும்.
முதன் முதலில் என்னுடைய தொழில் கொஞ்சம் முன்னேற ஆரம்பித்ததும் அடுத்த நிலைக்கு நான் போக முனைந்த போது நிதி, ஊழியர்கள், போதுமான இடம் என்று நிறைய விஷயங்களுக்கு நான் அலையை வேண்டி இருந்தது.
ஆனால் இவை எதுவுமே எனக்கு சுலபமாகக் கிடைக்கவில்லை. “பொண்ணுங்க தொழிலை அவ்வளவு கவனமா பண்ணமாட்டாங்க. பாதியிலேயே சரிவரலைன்னு விட்டுட்டு போயிட்டா எங்களுக்குத்தான் நட்டம்” என்று நான் உதவி கேட்டுப் போனவர்கள் என்னிடம் அதிருப்தியோடு ஆரம்பத்தில் பேசினர். ஆனால் நான் விடவில்லை.
இந்தத் தொழில் என்னுடைய மிகப் பெரிய இலக்கு என்பதை அவர்களுக்குப் புரிய வைத்தேன். எனக்கு வேண்டியவற்றைப் பெற்றுக் கொண்டேன்.” இப்படி தன்னுடைய வியாபாரம் வளர்ந்த கதை சொல்லும் வந்தனா அத்தோடு சும்மா இருந்து விடவில்லை.
சருமம்,கூந்தல், உடல் பராமரிப்புத் தயாரிப்புகளையும் கூடவே தயாரிக்க ஆரம்பித்தார். இதோ இந்தியா முழுக்க இவரது இந்தத் தயாரிப்புகள் சில்லறை வணிகத்திலும் கிடைக்கின்றன.
நம் முன்னேற்றத்துக்காக நாம் செய்யும் ஒவ்வொரு செயலையும் இந்த உலகம் ஒவ்வொரு மாதிரியாக விமர்சனம் செய்து கொண்டுதான் இருக்கும். அதற்கெல்லாம் பதில் சொல்லிக்கொண்டிருக்காமல் நம் வேலையை நாம் பார்த்தால் போதும் வென்றுவிடலாம் என்பதே வந்தனாவின் வாழ்க்கை நமக்குச் சொல்லும் வெற்றிப்பாடம்.
– சு.கவிதா.
