அரசு ஊழியர் பகுதிநேரத்தொழில் செய்யலாமா?

அரசில் வேறு துறைக்கு வேலைக்குச் செல்வது தங்களின் சொந்த விருப்பம்தான். அரசுத்துறையாக இருந்தால் நீங்கள் உங்கள் துறைவாயிலாக விண்ணப்பிக்க வேண்டும். தனியார் துறையில் இதுபோன்ற கட்டுப்பாடுகள் விதிக்கப்படுவதில்லை. உங்கள் விடுமுறைக்காலத்தில் வெளிநாட்டுப்பயணம் செய்து, அங்கு நேர்காணல்களைச் சந்தித்து, வேலைக்கான அழைப்பு கிடைத்தவுடன் தற்போதைய வேலையை விடலாம். அரசுப்பணியில் இருந்துகொண்டே பணி நிமித்தம் வெளிநாடு சென்று, அங்கேயே நிரந்தரமாகத் தங்கிவிடும் நோக்கத்தில் வேலை தேடினால் அது விதிமீறல் ஆகும்.

நீங்கள் விடுப்பு எடுத்து தொழில் செய்தாலும் பணியிலிருப்பதாகவே பொருள். விடுமுறை நாட்களுக்கும் சம்பளம் உண்டல்லவா! ஊதியமில்லா விடுப்பைப்பற்றிக் கேட்கிறீர்கள். சட்டம், உங்களுடைய விடுப்பின் தன்மையைப் பார்ப்பதில்லை. மாறாக, பணியிலிருக்கும்போது வேறு தொழில் செய்கிறீர்களா/பணிபுரிகிறீர்களா என்றுதான் பார்க்கிறது. எனவே, ஒரு அரசு ஊழியர், பொதுத்துறை ஊழியர், கூட்டுறவு ஊழியர் ஆகியோர் நிச்சயமாக பணியிலிருக்கும்போதும் விடுப்பில் இருக்கும்போதும் தொழில் செய்ய முடியாது.

ஒருவேளை உங்களுக்கு சுய தொழில் ஆர்வம் அதிகமாக இருக்கிறது, அதை ஏன் குழி தோண்டிப் புதைக்க வேண்டும் என்று நீங்கள் நினைக்கிறீர்கள். உங்கள் கருத்து நியாயமானது. உங்களது சுய தொழில் அறிவை, ஆர்வத்தை உங்கள் வாழ்க்கைத்துணையிடம் பகிருங்கள். அவர் பெயரில் தொழில் தொடங்குங்கள். அவர் தொழில் செய்ய நீங்கள் தாரளமாக உதவலாம். சட்டம் அதைத் தடுக்காது.

வீட்டில் ஒருவர் நிரந்தரப் பணியில் (அரசுப்பணியில்) இருக்கும்போது இன்னொருவர் ரிஸ்க் எடுத்து சுய தொழிலில் இறங்கலாம். இருவரும் இடர் மேற்கொள்ள வேண்டியதில்லை. கையில் நிறைய வருமானம் வருகிறது, இருவரும் முழுமையாக இறங்கினால் லட்சங்களைக் குவிக்கலாம் என்ற நிலை வரும்போது அரசுப்பணியை விட்டுவிடலாம்.

எந்த தொழில் செய்வதாக இருந்தாலும் அடுத்துவரும் 6 மாதங்களுக்கான குடும்ப பராமரிப்புக்கான தொகை உங்கள் சேமிப்பில் இருக்க வேண்டும் என்பது பொன்விதி. அதை மறக்காதீர்கள்.

நீங்கள் மாநில அரசு ஊழியரா, மத்திய அரசு ஊழியரா என்பது தெரிவிக்கப்படவில்லை. எனினும் மாநில அரசு ஊழியர் என்றே கருதி இப்பதில் தங்களுக்கு வழங்கப்படுகிறது. உங்கள் தந்தையார் உங்களுக்கு வாங்கித்தரும் மனை குறித்த தகவலை உங்கள் துறைத்தலைவருக்குத் (பெரும்பாலும் மாவட்ட ஆட்சியர்) தெரிவிக்க வேண்டும். இது தமிழ்நாடு அரசு ஊழியர் நடத்தை விதிகளின்கீழ் கட்டாயமாக செய்யப்பட வேண்டிய ஒன்று ஆகும்.

நீங்கள் தாராளமாக உங்கள் மனைவி பெயரில் வாகனம் வாங்கித்தொழில் செய்யலாம். தற்போது அரசு ஊழியர் நடத்தை விதிகளில் மாற்றங்கள் கொண்டுவரப்பட்டுள்ளன. குடும்ப உறுப்பினர்கள்பெயரில் சொத்து வாங்க இனி துறைத்தலைவரின் அனுமதியும் தேவையில்லை. இருப்பினும் அமைச்சுப் பணியாளர்களிடம் விசாரித்துவிட்டு, தேவைப்படும் ஆவணங்களை சமர்ப்பியுங்கள். நெஞ்சை நிமிர்த்தி, நேர்மையாகத் தொழில் நடக்கட்டும். தொழில் தொடர்பான எந்த ஆவணத்திலும் உங்கள் கையெழுத்து இருக்கக்கூடாது (கூட்டுத்தொழில் ஆவணம், உரிமங்கள், தடையின்மைச் சான்றிதழ், வாகனப் பதிவு முதலியவை)

உங்கள் தந்தை நிரந்தரப் பணி செய்யும் அலுவலகத்தில் நீங்கள் தற்காலிகப் பணியாளராகப் பணியாற்றுவது சட்ட விரோதமன்று. ஒரே காவல் நிலையத்தில் தந்தை காவலராகவும், மகள் உயர் அலுவலராகவும் பணியாற்றும் செய்திகளை நாம் பார்க்கிறோம்தானே… நிரந்தரப்பணிக்கே அப்படியெனும்போது தற்காலிகப்பணியில் இது ஒரு பிரச்சனையே இல்லை. உங்களுக்குத் தற்காலிகப்பணியைப் பெற்ற்றுத்தர உங்கள் தந்தை முறையற்ற வகையில் உதவியிருந்தால்தான் சிக்கலே ஒழிய…மற்றபடி எந்த பிரச்சனையும் இல்லை. எந்த சஞ்சலமும் இன்றி பணியைத்தொடருங்கள். தற்காலிக ஊழியர்கள் பகுதி நேரத்தொழில் செய்யவும் தடையில்லை என்பதையும் கவனத்தில் கொள்ளுங்கள். வாழ்த்துக்கள்!