சென்னை, டிச.19: கர்நாடகத் தமிழ்ப்பத்திரிகையாளர் சங்கம், 4 ஆவது ஆண்டாக பெங்களூரில் தமிழ்ப்புத்தகத் திருவிழாவை நடத்துகிறது. தி இன்ஸ்டிடியூஷன் ஆஃப் இஞ்சினியர்ஸ் அமைப்பின் அரங்கத்தில் (இந்தியன் எக்ஸ்பிரஸ் எதிரில்) டிச.20-29 தேதிகளில் இந்நிகழ்வு நடக்க இருக்கிறது. சுமார் 40 அரங்குகளில் தமிழ், கன்னட, ஆங்கில நூல்கள் இங்கு குவிக்கப்பட இருக்கின்றன. நுழைவுக்கட்டணம் கிடையாது. வாங்கும் நூல்களுக்கு 10% விலை தள்ளுபடியும் உண்டு. பார்வையாளர்களின் வாகனங்களுக்குக் கட்டணம் ஏதுமில்லை. காலை 10 மணி முதல் இரவு 9 மணி வரை புத்தகங்களை வாங்க முடியும்.
நாளை காலை (டிச.20, 2024) 11 மணிக்கு இந்திய விண்வெளி ஆய்வு நிறுவனத்தின் மேனாள் தலைவர் முனைவர் சிவன், கண்காட்சியைத் தொடங்கிவைக்கிறார். பெங்களூரு குடிநீர் வடிகால் வாரியத்தின் தலைவர் டாக்டர்.வி.ராம்பிரசாத் மனோகர் இ.ஆ.ப தலைமை வகிக்கிறார். தமிழ்நாடு அரசின் அயலகத் தமிழர் வாரியத்தின் தலைவர் திரு.கார்த்திகேய சிவசேனாபதி, திருவனந்தபுரம் தமிழ்ச்சங்கத்தின் பொதுச்செயலர் திரு.வீராணம் சு.முருகன் முதலிய பலரும் வாழ்த்துரை வழங்குவர். மாலை 5 மணிக்கு கன்னடக் கருத்தரங்கு நடைபெறுகிறது. தினந்தோறும் கலை, பொழுதுபோக்கு, இலக்கிய நிகழ்வுகள் நடைபெறுகின்றன. நூலரங்க நிகழ்வினை கர்நாடகப் பொன்விழாக் கொண்டாட்டத்தின் ஒரு பகுதியாக கன்னட வளர்ச்சி ஆணையத்தின் மேனாள் தலைவர் திரு.பேரா.எஸ்.ஜி.சித்தராமய்யா அவர்களின் தலைமையில் கருத்தரங்கம் நடைபெறுகிறது.
தமிழ் மொழித்திறன் போட்டிகளை மே.வங்க முன்னாள் தலைமைச்செயலர் திரு.கோ.பாலச்சந்திரன் இ.ஆ.ப தொடங்கி வைக்கிறார். இலக்கிய மாலை நிகழ்ச்சியில் இந்திய தொல்லியல் துறையைச் சேர்ந்த திரு.அமர்நாத் ராமகிருஷ்ணன் கலந்துகொள்வார். 25 ஆம் தேதி நடைபெறும் நூலரங்கம் நிகழ்ச்சியில் தமிழ்நாடு சட்டப்பேரவையின் துணைத்தலைவர் திரு.கு.பிச்சாண்டி கலந்துகொள்ளவிருக்கிறார். அறிவியல் அரங்க நிகழ்ச்சிகளில் அறிவியலாளர்கள் மயில்சாமி அண்ணாதுரை, வீரமுத்துவேல் ஆகியோர் சிறப்பிக்க உள்ளனர்.
“தமிழ் இலக்கியத்தையும் பண்பாட்டையும் கொண்டாடும் இந்நிகழ்வு, தமிழர்-கன்னடர் நல்லுறவைத் தூக்கிப் பிடிக்கும் உயரிய நோக்கத்துடன் நடக்க இருக்கிறது. கன்னடம் உள்ளிட்ட பல மொழிகளைத் தாய்மொழியாகக் கொண்டோரும் இதில் கலந்துகொண்டு சிறப்பிக்க இருப்பது பெருமகிழ்வைத்தருகிறது. திராவிட உறவுகளின் அன்புப்பாலத்தை மென்மேலும் உறுதியாக ஆக்க மென்மேலும் பல நிகழ்ச்சிகளை கர்நாடக தமிழ்ப்பத்திரிகையாளர் சங்கம் முன்னெடுக்க இருக்கிறது” என்று இவ்வமைப்பின் தலைவரும் மூத்த பத்திரிகையாளருமான திரு.முத்துமணி நன்னன், முனைவிடம் தெரிவித்தார்.
-ஸ்ரீஜா ராதாகிருஷ்ணன்.
