உங்களுக்கான ஏஐ எழுத்தாளர் ‘குவில் பாட்’ !

(இந்தத் தளம் தெரியுமா?-தொடரின் 9 ஆவது பகுதி)

எங்கும் ஏஐ அலை வீசிக்கொண்டிருக்கும் சூழலில் ’குவில்பாட்’ (https://quillbot.com/ ) சேவையை அறிமுகம் செய்து கொள்வது பொருத்தமாகவே இருக்கும். இந்த ’ஏஐ இறகுபேனா’ ஏஐ அலையில் பயணம் செய்ய உதவும் அதே நேரத்தில், ஏஐ அலையில் மூழ்கிவிடாமல் கரை சேரவும் உதவக்கூடியது.

ஆம், குவில்பாட் ஏஐ சேவை என்றாலும் மற்ற ஏஐ சேவைகளில் இருந்து வேறுபட்டது. ஏனெனில், தற்போது பரபரப்பாக பேசப்படும் பெரும்பாலான ஆக்கத்திறன் சேவைகள் போல, மனிதர்களுக்கு பதிலாக ஆக்கத்தில் ஈடுபடாமல், மனிதர்களின் படைப்பாற்றலுக்கும் உதவும் சேவையாக அமைந்திருக்கிறது. அந்த வகையில் குவில்பாட்டை எழுத்தாளர்களின் உதவியாளர் எனலாம்.

சாட்ஜிபிடி போன்ற சாட்பாட்கள், பயனாளிகள் உள்ளீட்டிற்கு ஏற்ப புதிய ஆக்கங்களை உருவாக்கித்தருகின்றன. இந்த படைப்புகளின் படைப்பூக்கமும் மூலத்தன்மையும் கேள்விக்குரியவை என்றாலும், மனித மெனக்கெடல் இல்லாமல் நொடிப்பொழுதில், ஆக்கங்களை அளித்து ஆச்சர்யப்படுத்துகின்றன என்பதை மறுக்க முடியாது. கூகுளின் ஜெமினி சாட் பாட்டும் இதே ரகம் தான்.

மனிதர்கள் போலவே இயந்திரங்களும் படைப்பாற்றல் சார்ந்த செயல்பாடுகளில் ஈடுபடுவதற்கு பின்னே, எல்.எல்.எம் என்று சொல்லப்படும் மொழி மாதிரிகளும் (langauge models) இன்னும் பிற நுட்பங்களும் இருக்கின்றன.

ஆக்கத்திறன் ஏஐ சாட்பாட்களை கொண்டு, பள்ளி மாணவர்களும் சரி, கல்லூரி- பல்கலை ஆய்வாளர்களும் சரி, வீட்டுப்பாடத்தையும், ஆய்வுக்கட்டுரையையும் எளிதாக உருவாக்கிக் கொள்ளலாம் என்பது நீங்கள் அறிந்ததே.

கையடக்க வாத்தியார்

குவில்பாட்டும் ஏஐ சார்ந்த சேவை மற்றும் எழுதுவதற்கு உதவி செய்யும் நோக்கத்தில் உருவாக்கப்பட்டது என்றாலும், அது பயனாளிகளுக்காக எதையும் எழுதித்தருவதில்லை, மாறாக, அவர்கள் எழுதியதை திருத்தி, செப்பனிட்டு, மேம்படுத்த உதவுகிறது. இதற்கு, இயந்திர கற்றல் மற்றும் என்.எல்.பி என சொல்லப்படும் இயற்கை மொழி செயலாக்கம் உள்ளிட்ட நுட்பங்கள் அடிப்படையில் இது செயல்படுகிறது.

குவில்பாட் பிரதானமாக என்ன செய்கிறது என்றால், ஆங்கில வாக்கியங்களை அதன் பொருள் மாறாமல், வேறு சொற்கள் அமைப்பில் மாற்றி தருகிறது.

நினைத்ததை எழுதுவது வேறு, சரியாக எழுதுவது வேறு அல்லவா? பலருக்கும் சொல்ல வந்த கருத்தை எழுதத்தெரிந்தாலும், அதன் வாக்கிய அமைப்பில் சிக்கலும் பிழைகளும் இருக்கலாம். அதில் மாற்றியும் திருத்தியும் எழுத வேண்டியிருக்கும். அதைத்தான் குவில்பாட் சேவை செய்கிறது.

பயனாளிகள் தங்கள்  படைப்புகளை இதில் சமர்பித்தால், அதன் மொழி நடையை அலசி ஆராய்ந்து, தேவையான திருத்தங்களைச் செய்து தெளிவான நடையில் உருமாற்றித்தருகிறது. மூலம் மட்டும் பொருள் மாறாமல் அப்படியே இருக்கும். கல்லூரி மாணவர்களுக்கும், ஆய்வு மாணவர்களுக்கும் இந்த சேவை பயனுள்ளதாக இருக்கிறது. அதிலும் ஆங்கிலத்தில் எழுதுவதில் போதிய நம்பிக்கை இல்லாத மாணவர்களுக்கு, இந்த சேவை அவர்கள் எழுத்தில் உள்ள இலக்கணப்பிழை, மொழி நடை தவறுகளை சரி செய்து வாசிப்புத்தன்மையை அளிக்கிறது.

ஆய்வுக்கட்டுரைகளை சமர்பிக்கும் போது, தவறுகளை சரி செய்வதோடு அதற்கு என உரிய குறிப்பிட்ட நடையில் அமைத்துத் தருகிறது.மாணவர்கள் எழுதியதை ஒரு அனுபவம் வாய்ந்த நல்லாசிரியர் படித்துப்பார்த்து மாற்றி எழுதி தருவது போல இந்த சேவை செயல்படுகிறது. ஆங்கில மொழி ஆக்கங்கள், ஆய்வுக்கட்டுரைகள் கொண்டு இந்த சேவை பயிற்சி அளிக்கப்பட்டுள்ளதால், இயந்திர கற்றல் திறன் அடிப்படையில் பயனாளிகள் ஆக்கத்தை அலசி ஆராய்ந்து திருத்தி தருகிறது.

மாணவர்கள் இந்த சேவையை கற்றல் நோக்கிலும் பயன்படுத்தலாம். ஆங்கிலத்தில் இயல்பாக எழுதும் திறன் இல்லாதவர்களும் கூட தங்கள் அலுவல் கடிதம் போன்றவற்றை இந்த சேவை மூலம் மேம்படுத்திக்கொள்ளலாம்.

ஆக, இந்த சேவை மூல ஆக்கத்திற்கு பதிலீடாக அல்லாமல் மூல ஆக்கத்தை மேம்படுத்தவே ஏஐ நுட்பத்தை பயன்படுத்துவதாக இருக்கிறது. இந்த சேவையின் வேகமும், செயல்திறனும் வியக்க வைப்பதை உணரலாம். எழுதியதை சமர்ப்பித்ததும், அதில் உள்ள பிழைகளை சுட்டிக்காட்டி மாற்றங்களை பரிந்துரைக்கிறது. பின்னணியில் ஆங்கில ஆசான்கள் ஒளிந்திருந்து செயல்படுகின்றனரே என சந்தேகிக்கும் வகையில் இதன் செயல்பாடு இருக்கிறது. எல்லாம், ஏஐ செய்யும் மாயம்.

ஆக, ஏஐ நுட்பம் எந்த அளவு உதவியாக இருக்கிறது என்பதை குவில்பாட் மூலம் உணரலாம். ஆனால், அதே நேரத்தில் மனித ஆக்கத்திற்கு மாற்று இல்லை என்ற தெளிவையும் பெறலாம்.

குவில்பாட் சேவையில் பொழிப்புரை என புரிந்து கொள்ளக்கூடிய உருமாற்றம் தவிர, இலக்கண பிழைத்திருத்தம், சுருக்கமாக்கல் சேவை, மொழிபெயர்ப்பு உள்ளிட்ட வசதிகளும் இருக்கின்றன. ஏஐ சோதனை மற்றும் இலக்கிய திருட்டு நடந்திருக்கிறதா என்ற  சோதனை வசதியும் இருக்கிறது. பிரவுசர்களுக்கான நீட்டிப்பு சேவையாக தரவிறக்கியும் பயன்படுத்தலாம். இதே முறையில் வேர்டு மென்பொருளுக்கான நீட்டிப்பு சேவையாக தரவிறக்கி, எழுதும் போதே எளிதாகப் பயன்படுத்தலாம். அடிப்படை சேவை இலவசம் என்றாலும் மேம்பட்ட வசதிகளை கட்டணச்சேவை அளிக்கிறது.

நம்ம பையன்தான்!

அமெரிக்காவில் உயர் கல்வி படித்துக்கொண்டிருந்த இந்திய மாணவர் அனில் ஜேசன், ரோகன் குப்தா மற்றும் டேவிட் சிலின் உள்ளிட்ட சக மாணவர்களுடன் இணைந்து இந்த சேவையை உருவாக்கினார். பொறியியல் மாணவர்களான தங்களுக்கு சரியாக ஆங்கிலத்தில் எழுதுவதில் உதவி தேவை என உணர்ந்து, அதற்கு ஏற்ப ஏஐ நுட்பத்தின் உதவியோடு தீர்வு வழங்கும் இந்த சேவையை உருவாக்கினர். இவர்கள் பிரச்சனைக்கு தீர்வாக உருவான இந்த சேவை இன்று லட்சக்கணக்கான பயனாளிகளின் எழுத்து பிரச்சனைக்கு தீர்வாகிறது.

இந்த சேவையை ஆக்கங்களை போலி செய்யவும் பயன்படுத்தலாம் என்றாலும், பெரும்பாலானோர், சொந்த ஆக்கங்களை திருத்தி மேம்படுத்தவே பயன்படுத்துகின்றனர். ஏஐ சேவையை எப்படி பயன்படுத்த வேண்டும் என்பதற்கும் குவில்பாட் உதாரணமாக விளங்குகிறது.

-சைபர் சிம்மன்.

(கட்டுரையாளர், இணையமலர் மின்மடல் ஆசிரியர், பத்திரிகையாளர். https://cybersimman.substack.com/ )